Hiar uff meener Saide gönn´ Se sisch gurz in meener "Landessprache" iber misch, meene bolid´schn Ziehle un de Aggdividädn im säggsschn Landdaach un im Woalkraiß Groußenhain informiern. Viel Spoaß beim Lunndschn winscht Ihn´

Ihrr Sebastian Fischer

Iber misch

In Saggsn binsch uffde Weld gegomm un offgewachsn, so is unsor Wraischdaad immor meene Heimad gebliebn.
Mibm Abschluss meener Ausbildung zum Goch in Drähsdn, baggde isch meen Habchn un Babchn, vorkriemelde misch un aggorde ieworahl in dor Weld, bin in Deidschland un Eirouba rumgeguddschd. So verdiiende isch meene Mäbbse uff dor Insl Föhr, in Birgels in dor Schweez, arwedede in Villeneuve l’Archevêque in Frangreisch un da habsch uff meene Reesn französsch un norwegsch gelährnt un ooch verschiednsde Guldurn un Lähmsweisen. Nu, un dann binsch zum Millidärdienst un war dichdch in dor Grundausbildung uff Sylt als Smutje beim Zweetn Schnellboutgeschwodor in Rostock-Warneminde. Morr ieworgwärdn de Osdsäh un legdn mid unsorm Bohut undor andrem in Gobenhagn, Giel, Århus, Gödeborg un Garlsgrouna an.

Seid 2003 binsch Midglied inner Jung Unnjon Saggsn un Niederschlesjn un innor Bardei - innor CDU Meißn, seid 2006 ooch Vorsitzndor vonor CDU Briesdewidz. Nach meener Nomminierung als Gandidat dor CDU fir de Landdachswoahlen, bin isch im Ougust 2009 zum Landdaachsabgeordnetn fir Groußenhain un de Umgebung gewählt wordn. In meener Bositsjon fungiere isch als Verbrauchorschudz- un Weinbollidscher Sprechor dor CDU-Frakdsjon im Säggsschen Landdach un bin in de Ausschüsse fir Umweld un Landwürdschafd un ooch fir Sozjales un Verbrauchorschudz dädsch.

Als kleener Selbschdändscher gloob isch ans Brinnzib vom Förrdorn un Forrdorn un schdeh zu eem gesundn Schdolz uff unsre säggssche un doidsche Heimot. Desdorweschn sinn de CDU un de Junge Unnjon meen bollid´sches Heeme. Isch duhe meene eegnen Ieberzeigung in de Landdachsdebaddn neinbullforn un bin ieberzeigd, dass morr unsere Zugunfd midd Muhd, Forsche un Ausdauor pousidiv geschdaldn wern. Dazu brauchsch ooch Ihrre Hülfe: Soochn Ses mirr eefach, schreibm Se mirr, wenn Se Huddelei ham un dann tu ich ma guggn, was ich tuhn gann. Isch freu misch offn Dialoug. Danggscheen!

Machenses hibsch!
Addjee!

Ihrr Sebastian Fischer